Valur Ásberg Valsson hefur verið ráðinn framkvæmdastjóri Kælitækni frá og með 1. nóvember næstkomandi.

Valur starfaði sem framkvæmdastjóri hjá Ölgerð Egils Skallagrímssonar frá árinu 2008, en alls starfaði hann hjá Ölgerðinni í 20 ár, síðast sem framkvæmdastjóri Egils áfengrar drykkjavöru og fyrirtækjaþjónustu. Valur útskrifaðist með B.Sc. í iðnaðartæknifræði frá Háskólanum í Reykjavík árið 2003. Valur hefur víðtæka reynslu í rekstri og sölu- og markaðsmálum og kemur til liðs við Kælitækni á tímum breytinga og vaxtar.

Kælitækni er yfir 60 ára gamalt fyrirtæki sem þjónustar kæliiðnaðinn á Íslandi í stóru og smáu. Félagið hefur vaxið mikið síðustu ár og er nú með umsvifamestu fyrirtækjum á sínu sviði á Íslandi, bæði á sviði vörusölu og þjónustu.  Félagið hefur einnig haslað sér völl erlendis á síðustu árum við hönnun og sölu á kælibúnaði fyrir stór fyrirtæki á sviði matvælaframleiðslu.

,, Við væntum mikils af samstarfi við Val á komandi árum. Reynsla hans og þekking í íslensku viðskiptalífi er víðtæk og við teljum að innkoma hans sem framkvæmdastjóri fyrirtækisins muni styðja við vöxt starfseminnar og leiða félagið inn í framtíðina,“ segja Haukur Njálsson og Erlendur Hjaltason fyrir hönd stjórnar Kælitækni.