Í maí og júní setti Kælitækni upp nýtt kælikerfi fyrir IKEA í Kauptúni. Verkefnið sneri að kælingu á vinnslurými þar sem smurbrauð er útbúið, ásamt uppsetningu á nýjum kæli fyrir hráefni í sama rými.

IKEA vantaði vinnslurými með réttu hitastigi fyrir smurbrauðsgerð. Matvælavinnsla af þessu tagi gerir kröfu um stöðugt og rétt hitastig, bæði í rýminu sjálfu og fyrir þau hráefni sem unnið er með. Til að mæta þeirri þörf var ráðist í heildstæða lausn sem nær utan um hvort tveggja.

Vinnslurýmið er kælt niður í 16 gráður með loftkælingu frá Midea, þar sem kassettur og multi-split vélakerfi sjá um kælinguna. Multi-split kerfið getur þjónað fleiri en einum blásara á einu vélakerfi, sem gefur sveigjanleika í uppsetningu. Fyrir hráefnin var settur upp kæliklefi í sama rými, kældur með HEOS kælikerfi.

Til að fylgjast með rekstrinum var sett upp Carel Boss kerfi sem skráir hitastig jafnóðum og sendir viðvörun ef frávik koma upp. Þannig er hægt að bregðast við áður en til vandræða kemur og tryggja að hitastig haldist innan marka í matvælavinnslunni.

Þessi útfærsla hentaði verkefninu vel, auk þess að uppfylla kröfur um hitastig í matvælavinnslu styður lausnin við þá vegferð IKEA að gera kælikerfin sín umhverfisvænni.